काठमाडौं । सूचना प्रविधिको क्षेत्रबाट आफ्नो व्यावसायिक यात्रा सुरु गर्दै राजनीतिक संगठन र सार्वजनिक नीतिसँग जोडिएका दिपेश विष्ट नेपाली कांग्रेसमा सक्रिय व्यक्तित्वका रूपमा देखिएका छन् ।

कीर्तिपुर–४ निवासी विष्टले कम्प्युटर इन्जिनियरिङ, कानुन तथा ग्रामीण विकाससम्बन्धी अध्ययनसँगै प्रविधि र राजनीतिक क्षेत्रको अनुभव हासिल गरेका छन् । बहुआयामिक शैक्षिक पृष्ठभूमि भएका विष्टले इन्जिनियरिङ तथा ग्रामीण विकासमा स्नातकोत्तर, B.A.LL.B तथा BEComputer अध्ययन गरेका छन् । यससँगै उनी पेशागत रूपमा कम्प्युटर इन्जिनियर तथा सूचना प्रविधि उद्यमी (IT Entrepreneur) का रूपमा कार्यरत रहेका छन् ।

प्रधानमन्त्रीका आईटी सल्लाहकारका रूपमा काम गरेको अनुभव भएका विष्टको अनुभवले सूचना प्रविधिको प्रयोगमार्फत सरकारी सेवा र प्रशासनलाई थप प्रभावकारी बनाउने विषय पछिल्ला वर्षहरूमा सार्वजनिक बहसको महत्वपूर्ण हिस्सा बन्दै आएको ई–गभर्नेन्ससँग पनि जोडिएको छ । ई–गभर्नेन्स कमिसनका संस्थापक सीइओ तथा सदस्य–सचिवका रूपमा समेत काम गरेका विष्टले प्रधानमन्त्रीको अध्यक्षतामा रहने उक्त संरचनामार्फत सूचना प्रविधि र सरकारी प्रणालीबीचको समन्वय तथा डिजिटल प्रशासनसँग सम्बन्धित काममा विज्ञता हासिल गरेका छन् ।

विष्टले प्रविधि क्षेत्रको अनुभवलाई राजनीतिक संगठनसँग जोड्दै नेपाली कांग्रेसको डिजिटल रूपान्तरणमा समेत काम गरिसकेका छन् । पछिल्लो ६ वर्षदेखि पार्टीको डिजिटल रूपान्तरणमा मुख्य प्राविधिक नेतृत्व गरिसकेका विष्टको राजनीतिक यात्रालाई पनि यही प्रविधि र संगठनबीचको सम्बन्धसँग जोडेर हेर्न सकिन्छ । नेपाली कांग्रेसको महासमिति सदस्य तथा नीति अनुसन्धान तथा प्रशिक्षण प्रतिष्ठानको केन्द्रीय सदस्य रहेका विष्ट केन्द्रीय प्रचार विभागका पूर्व केन्द्रीय सदस्य समेत हुन् । यस्तै, नेपाली कांग्रेसको इन्जिनियरहरूको संस्था CDEN का पूर्व महासचिवको जिम्मेवारी समेत सम्हालिसकेका विष्ट नेपाल इन्जिनियर्स काउन्सिलका पूर्व बोर्ड सदस्य समेत भइसकेका छन् ।

सूचना प्रविधि क्षेत्रमा लामो समय काम गरेका व्यक्तिका रूपमा विष्टको राजनीतिक परिचय परम्परागत राजनीतिक पृष्ठभूमिभन्दा केही फरक देखिन्छ । कम्प्युटर इन्जिनियरिङ, IT  उद्यमशीलता, ई–गभर्नेन्स र डिजिटल राजनीतिक संगठनमा काम गरेको अनुभवलाई उनले आफ्नो राजनीतिक यात्रासँग जोड्दै आएका छन् ।

विशेषगरी नेपाली कांग्रेसजस्तो पुरानो राजनीतिक दलमा डिजिटल प्रविधिको प्रयोग र नयाँ पुस्तासँगको संवाद विस्तार गर्ने क्रममा प्राविधिक पृष्ठभूमिका नेताहरूको सहभागिता उल्लेखनीय विषय बन्न सक्छ ।