काठमाडौं । नेपालको इतिहास, संस्कृति र प्राचीन ज्ञानसम्बन्धी पुस्तक तथा अनुसन्धान सामग्रीमा रुचि राख्ने पाठकका लागि संशोधन–मण्डलले पुस्तक मेला आयोजना गर्ने भएको छ । संस्थाको प्रकाशन यात्राले ७४ वर्ष पूरा गरेको अवसरमा असोज २५ देखि ३० गतेसम्म डल्लु आवासमार्गस्थित कार्यालयमा मेला संचालन हुनेछ । संस्थाका अध्यक्ष महेशराज पन्तले मेलामार्फत पाठकले विभिन्न ऐतिहासिक स्रोत र अनुसन्धानमा आधारित प्रकाशन प्राप्त गर्न सक्ने बताउनुभएको छ ।

इतिहास, संस्कृति, व्याकरण र ज्योतिषशास्त्रको अध्ययन–अनुसन्धानमा योगदान पुर्याउँदै आएको संशोधन–मण्डल इतिहासशिरोमणि नयराज पन्तको पहलमा अघि बढेको प्राज्ञिक संस्था हो । इतिहास लेखनमा रहेका त्रुटि र भ्रमलाई तथ्य तथा प्रमाणका आधारमा सच्याउने उद्देश्यले सुरु गरिएको यसको अध्ययन परम्पराले नेपाली इतिहासको अनुसन्धान र लेखनमा महत्त्वपूर्ण योगदान दिएको छ ।

संस्थाले संस्कृत, गणित, ज्योतिष, प्राचीन ब्राह्मी लिपि तथा अन्य लिपिको अध्ययनसँगै ऐतिहासिक सामग्रीको खोज, परीक्षण र विश्लेषण गर्दै आएको छ । यसबाट नेपालको प्राचीन तथा मध्यकालीन इतिहासका विभिन्न पक्ष बुझ्न पाठक र अनुसन्धानकर्तालाई सहयोग पुगेको छ ।

नेपालको इतिहास र संस्कृतिको अध्ययनले विगतका अनुभवबाट सिक्दै वर्तमानलाई बुझ्न र भविष्यका लागि स्पष्ट दृष्टिकोण बनाउन मद्दत गर्छ । त्यसैले पुस्तक मेलालाई ऐतिहासिक स्रोत र अनुसन्धानमूलक कृतिसँग जोडिने अवसरका रूपमा लिन सकिनेछ ।