काठमाडौं । नागढुंगा–सिस्नेखोला सुरुङमार्ग प्रयोग गर्ने सवारीसाधनले आज (कात्तिक १५) देखि सडक उपभोग दस्तुर अर्थात् टोल शुल्क तिर्नुपर्ने भएको छ । सुरुङमार्ग निर्माण आयोजनाले सवारीसाधनको प्रकार र काठमाडौं प्रवेश तथा बाहिरिने दिशाका आधारमा फरक–फरक शुल्क निर्धारण गरेको छ ।

आयोजनाले कात्तिक १२ गते सार्वजनिक सूचना जारी गर्दै नयाँ शुल्कदरबारे जानकारी गराएको हो । नेपाल राजपत्रमा २०८२ चैत २६ गते प्रकाशित सूचनाअनुसार सुरुङमार्ग प्रयोग गर्ने सवारीसाधनबाट दस्तुर संकलन गर्न लागिएको आयोजनाले जनाएको छ ।

निर्धारित शुल्कअनुसार कार, भ्यान, पिकअप, ट्र्याक्टर, माइक्रोबस तथा अन्य हलुका सवारीसाधनले काठमाडौं प्रवेश गर्दा ६५ रुपैयाँ र काठमाडौं बाहिरिँदा ६० रुपैयाँ तिर्नुपर्नेछ । मिनिबस तथा मिनिटिपर÷ट्रकका लागि प्रवेश शुल्क ११५ रुपैयाँ र बाहिरिने शुल्क ८० रुपैयाँ तोकिएको छ ।

त्यस्तै, बस तथा सिंगल रियर एक्सल भएका ट्रकले काठमाडौं प्रवेश गर्दा २६० रुपैयाँ र बाहिरिँदा २०० रुपैयाँ तिर्नुपर्नेछ । मल्टी एक्सल ट्रक, अन्य ठूला सवारीसाधन तथा भारी उपकरणका लागि भने प्रवेश गर्दा ६०० रुपैयाँ र काठमाडौं बाहिरिँदा २५० रुपैयाँ शुल्क निर्धारण गरिएको छ ।

सवारीसाधनअनुसार टोल शुल्क

सवारीसाधनको प्रकार : कार, भ्यान, पिकअप, ट्र्याक्टर, माइक्रोबस तथा हलुका सवारी

काठमाडौं प्रवेश : रु. ६५

काठमाडौं बाहिरिँदा : रु. ६०

मिनिबस तथा मिनिटिपर-ट्रक

रु. ११५, रु. ८०

बस तथा सिंगल रियर एक्सल ट्रक

रु. २६०, रु. २००

मल्टी एक्सल ट्रक तथा भारी उपकरण

रु. ६००, रु. २५०