काठमाडौं । चन्द्रागिरि नगरपालिका–६ स्थित चन्दन भराटेश्वर महादेव मन्दिर परिसरमा हरितालिका तीजको अवसरमा आयोजना हुँदै आएको नाचगान कार्यक्रम यस वर्ष स्थगित गरिएको छ ।

चन्द्रागिरि नगरपालिका–६ नं. वडा कार्यालयले एक सूचना जारी गर्दै तीजका अवसरमा मन्दिर परिसरमा आयोजना हुने भनिएको कार्यक्रम स्थगित भएको जानकारी दिएको हो ।

वडा कार्यालयका अनुसार विगतका वर्षहरूदेखि हरितालिका तीजको अवसरमा मन्दिर परिसरमा महिलाहरूका लागि सामूहिक रूपमा नाचगान कार्यक्रम सञ्चालन हुँदै आएको थियो । तीजको अवसरमा स्थानीय महिला तथा भक्तजनको सहभागितामा आयोजना गरिने उक्त कार्यक्रम यस वर्ष भने देशमा उत्पन्न शोकपूर्ण अवस्थालाई ध्यानमा राख्दै स्थगित गरिएको हो ।

रसुवाको भोटेकोशी नदीमा आएको बाढीका कारण देश नै शोकमय अवस्थामा रहेकाले तीजको अवसरमा मन्दिर प्राङ्गणमा हुने नाचगान कार्यक्रम स्थगित गरिएको उल्लेख गरिएको छ । प्राकृतिक विपद्का कारण जनधनको क्षति भएको अवस्थामा उल्लासपूर्ण कार्यक्रम आयोजना गर्नु उपयुक्त नहुने भन्दै वडा कार्यालयले कार्यक्रम रोक्ने निर्णय गरेको जनाएको छ ।

हरितालिका तीज हिन्दु महिलाहरूले भगवान् शिवको पूजा–आराधना गर्दै मनाउने महत्वपूर्ण पर्व हो । यस अवसरमा महिलाहरू सामूहिक रूपमा भेला भएर पूजा, भजन–कीर्तन तथा नाचगान गर्ने प्रचलन रहँदै आएको छ । चन्दन भराटेश्वर महादेव मन्दिरमा पनि विगतका वर्षहरूमा तीजका अवसरमा महिलाहरूको उल्लेख्य सहभागितामा विभिन्न कार्यक्रम हुँदै आएका थिए ।

तर यस वर्ष रसुवाको भोटेकोशी नदीमा आएको बाढीबाट सिर्जित विपद्का कारण तीजको नाचगान कार्यक्रम स्थगित गरिएको वडा कार्यालयले जनाएको छ । कार्यक्रम स्थगित गरिए पनि तीजको धार्मिक तथा सांस्कृतिक पक्षअनुसार गरिने पूजाआजा भने प्रभावित हुनेबारे सूचनामा उल्लेख गरिएको छैन ।

चन्द्रागिरि नगरपालिका–६ नं. वडा कार्यालयका कार्यवाहक वडा अध्यक्ष विवेक ढकालद्वारा जारी सूचनामा विपद्का कारण ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति हार्दिक समवेदना समेत व्यक्त गरिएको छ ।